മീൻ അച്ചാർ

മീൻ - 1 കിലോ
(വറ്റ, പാര, നെയ്മീൻ, നെയ്മീൻ ചൂര ഇതിൽ ഏതെങ്കിലും ചെറിയ കഷണങ്ങളായി നുറുക്കിയത്)

മീനിൽ പുരട്ടാൻ
മുളക് പൊടി - 3 ടി സ്പൂണ്‍
മഞ്ഞൾ പൊടി - 1 ടി സ്പൂണ്‍
ഉലുവ പൊടി - 1 ടി സ്പൂണ്‍
കുരുമുളകുപൊടി - 1 ടി സ്പൂണ്‍
അല്പം വിനിഗർ (വെള്ളത്തിന്‌ പകരം)
ഉപ്പു നേരത്തെ ചെര്തതിനാൽ വേണെമെങ്കിൽ മാത്രം ചേര്ക്കുക. മസാല പുരട്ടി 30 മിനിറ്റ് വെക്കുക.

വെളിച്ചെണ്ണ - 1 കപ്പ്‌

ഒരു ചീന ചട്ടിയിൽ അല്പം എണ്ണ ഒഴിച്ച് ആദ്യം വെളുത്തുള്ളി വാട്ടി വഴറ്റി കോരുക.

വാട്ടിയ വെളുത്തുള്ളി വൃത്തിയുള്ള ഉണങ്ങിയ ഈര്പ്പം ഇല്ലാത്ത ഒരു ബൌളിലേക്ക് മാറ്റുക.

ഇനി ബാക്കി എണ്ണ കൂടി ഒഴിച്ച് മീൻ കഷണങ്ങൾ ഇട്ടു വറുത്തു കോരുക. രണ്ടു മൂന്നു തവണയായി വറുത്തെടുക്കുക. അവസാനം വറുക്കുന്നതിന്റെ കൂടെ പച്ചമുളക് കൂടി ചേർത്ത് വഴറ്റുക.

വെളുത്തുള്ളിയുടെ കൂടെ മീനും കൂടി ഇട്ടു കരുതി വെച്ചിരിക്കുന്ന വിനിഗർ ചേർത്ത് കുടഞ്ഞു ഇളക്കി ചേര്ക്കുക. അതവിടെ കുറച്ചു നേരം ഇരിക്കട്ടെ.

മസാലക്കു

വെളിച്ചെണ്ണ - 1/4 കപ്പ്‌
കടുക് - 1 ടി സ്പൂണ്‍
ഇഞ്ചി അരിഞ്ഞത് - 1/4 കപ്പ്‌
വെളുത്തുള്ളി - 1/2 കപ്പ്‌ (ചെറിയതെങ്കിൽ മുഴുവനെ ഇടാം, വലുതെങ്കിൽ ഒന്നോ രണ്ടോ ആയി നീളത്തിൽ മുറിക്കുക)
പച്ചമുളക് - 5 അല്ലെങ്കിൽ 6 ഓരോന്നും 4 ആയി അരിയുക.
കറിവേപ്പില - 6 തണ്ട് (ഇലയും തണ്ടും ഉപയോഗിക്കുക)
കാശ്മീരി മുളക് പൊടി - 3 ടേബിൾ സ്പൂണ്‍
മഞ്ഞൾ പൊടി - 1 ടി സ്പൂണ്‍
കുരുമുളക് പൊടി - 1 ടി സ്പൂണ്‍
കായം - 1 ടി സ്പൂണ്‍
വറുത്തു പൊടിച്ച ഉലുവ - 1 ടി സ്പൂണ്‍
വിനിഗർ - 1 കപ്പ്‌

ചീന ചട്ടിയിൽ എണ്ണ ഒഴിച്ച് കടുക് പൊട്ടിക്കുക. ഇനി അതിലേക്കു കറിവേപ്പില ചേർത്ത് മൂപ്പിക്കുക. ഇതിലേക്ക് ഇഞ്ചി ചേർത്ത് വഴറ്റി മൂപ്പിക്കുക. പിറകെ കുരുമുളക് പൊടി ഉലുവ പൊടി കായം ഇവ ഇട്ടു മൂപ്പിക്കുക. ശേഷം മഞ്ഞള്പൊടി മുളകുപൊടി എന്നിവ ചേർത്ത് കരിയാതെ തീ കുറയ്ക്കുക. ഈ മസാലയിലേക്ക് തയ്യാറാക്കി വെച്ചിരിക്കുന്ന മീൻ ചേർത്ത് ഉടയാതെ ഇളക്കി യോജിപ്പിക്കുക.

ഉപ്പു ആവശ്യമെങ്കിൽ ചേര്ക്കുക. മീൻ അച്ചാർ തയ്യാർ!

തണുത്ത് കഴിഞ്ഞാൽ ഭരണിയിലേക്ക് മാറ്റുക.

Enjoyyy!!!!

ടിപ്സ്

മീൻ ഉപ്പിട്ട് കഴുകി വാരി ഒരു പരന്ന തട്ടിൽ വെയിലത്ത്‌ വച്ച് ജലാംശം കളയുക. അല്പം കഴിഞ്ഞു കഷണങ്ങൾ തിരിച്ചു വെച്ച് ഉണക്കുക. ഈർപ്പം മാറിയാൽ മതി, ഉണങ്ങി കല്ലുപോലെ ആവേണ്ട.

മീൻ വറുക്കുമ്പോൾ നന്നായി മൂപ്പിക്കാൻ ശ്രെദ്ധിക്കുക, എന്നാൽ കരിയുകയും അരുത്.

മീൻ വറുത്ത എണ്ണ അരപ്പ് തയ്യാറാക്കാൻ ഉപയോഗിക്കാതെ ഇരിക്കുന്നതാണ് നല്ലത്. നെയ്‌ ഉള്ള മീൻ ആണെകിൽ മീൻ വറുക്കുമ്പോൾ നെയ്‌ എണ്ണയിൽ ഇറങ്ങി രുചി വ്യെത്യാസം ഉണ്ടാവും. ഇതു അച്ചാറിന്റെ രുചി, ക്വാളിറ്റി കെടുത്തും.

കണ്ണാടി ഭരണി അല്ലെങ്കിൽ കൽ ഭരണി ഇതൊക്കെ ആണ് അച്ചാറിനു നല്ല പാത്രങ്ങൾ. സുർക്ക അല്ലെങ്കിൽ വിന്നാഗിരി ചേർക്കുമ്പോൾ എന്തെങ്കിലും തര രാസ പ്രവർത്തനങ്ങൾ ഉണ്ടാവാതിരിക്കാൻ ഇത് സഹായിക്കും.

അച്ചാർ ഇടുന്നതിനു മുന്നേ തന്നെ ഈ ഭരണി കഴുകി നല്ല വെയിലത്ത്‌ വെച്ച് അകവും പുറവും നന്നായി ഉണക്കി എടുക്കുക.

നന്നായി മുറുക്കി അടക്കാൻ പറ്റുന്ന അടപ്പുള്ള പാത്രം തന്നെ അച്ചാറിട്ടു വെക്കാൻ തിരഞ്ഞെടുക്കുക. അടപ്പ് മുറുകുന്നില്ല എങ്കിൽ വൃത്തിയുള്ള ഒരു തുണി കഷണം കഴുകി ഉണക്കി കുപ്പിയുടെ വായിൽ ഇട്ടു അടപ്പ് കൊണ്ട് മുറുക്കി അടക്കുക.

അടപ്പ് നന്നായി മുറുകിയില്ല എങ്കിൽ കണ്ണീച്ച കയറാനും അത് അച്ചാറിൽ മുട്ടയിട്ടു പുഴു ഉണ്ടാവാനും ഇടയാകും.

അച്ചാർ കുപ്പിയിൽ/ഭരണിയിൽ ആക്കിയ ശേഷം രണ്ടു ടേബിൾ സ്പൂണ്‍ എണ്ണ ചൂടാക്കി അതിൽ ഒരു ചെറിയ കഷണം കായം മൂപ്പിച്ചിട്ട് ആ എണ്ണ അച്ചാറിനു മേൽ ഒഴിക്കുക.

അച്ചാർ എടുക്കാൻ ഉപയോഗിക്കുന്ന സ്പൂണ്‍ സ്ടവിന്റെ അല്ലെങ്കിൽ ഒരു മെഴുതിരിയുടെ ഫ്ലയ്മിൽ കാണിച്ചു ഉണക്കിയിട്ടു മാത്രം കുപ്പിയിൽ ഇടുക.

യാതൊരു കാരണവശാലും സ്പൂണ്‍ കുപ്പിയിൽ തന്നെ ഇട്ടു വയ്ക്കാതിരിക്കുക - അച്ചാർ വേഗം പൂപ്പൽ പിടിച്ചു കേടായി പോകും.

ഇടക്കിക്കിടക്ക് അച്ചാർ ഒന്ന് കുലുക്കി യോജിപ്പിക്കുന്നത് അരപ്പും വിനിഗരും എണ്ണയുമൊക്കെ നന്നയി കഷണങ്ങളിൽ പുരണ്ടു ഇരിക്കാൻ സഹായിക്കും. ഇല്ലെങ്കിൽ അവസാനമാവുമ്പോൾ മീൻ ഇല്ലാതെ വെറും അരപ്പ് മാത്രം ഭരണിയിൽ അവശേഷിക്കും

മീൻ (മുളകരച്ച കറി)

മീൻ - 1/2 കിലോ
(കാളാഞ്ചി, ആവോലി, വറ്റ, കാരി, ഇങ്ങനെ നല്ല ദശയുള്ള മീൻ)

കുടംപുളി - 3 ചുള
ഉപ്പു - ആവശ്യത്തിനു

അരക്കാൻ
മുളകുപൊടി - 4 ടി സ്പൂണ്‍ (നല്ല എരിവുണ്ടേ)
മഞ്ഞൾ പൊടി - 1/2 ടി സ്പൂണ്‍
കുരുമുളക് - 1 ടി സ്പൂണ്‍
ഇഞ്ചി നുറുക്കിയത് - 1 വലിയ കഷണം
വെളുത്തുള്ളി - 3 അല്ലി (വലുത്) അല്ലെങ്കിൽ 6 അല്ലി (ചെറുത്)
കറിവേപ്പില - 4 അല്ലെങ്കിൽ 5 ഇല

താളിക്കാൻ
വെളിച്ചെണ്ണ - 2 ടേബിൾ സ്പൂണ്‍
ഉലുവ - 1/2 ടി സ്പൂണ്‍
കടുക് - 1/2 ടി സ്പൂണ്‍
കൊച്ചുള്ളി - 3 അരിഞ്ഞത്
ഇഞ്ചി - 1 ടി സ്പൂണ്‍ പൊടിയായി അരിഞ്ഞത്
കറിവേപ്പില - 2 തണ്ട്

മീൻ വെട്ടി കഴുകി തയ്യാറാക്കി വെക്കുക (അല്പം കടുക് അരച്ചതും അല്പം ഉപ്പും പുരട്ടി വെച്ചിരുന്നാൽ മീൻ നല്ല ഉറപ്പുള്ള കഷണങ്ങൾ ആയി ഇരിക്കും)

ഒരു ചട്ടിയിൽ കുടംപുളി അല്പം വെള്ളവും ഉപ്പും ചേർത്ത് അടുപ്പത് വേവിക്കാൻ വെക്കുക.

ഈ സമയം കൊണ്ട് അരക്കാൻ ഉള്ളവ (കറിവേപ്പില ഒഴികെ) ചട്ണി ജാറിൽ നന്നായി അരച്ച് എടുക്കുക. ഇനി മൂടി തുറന്നു കറിവേപ്പില ചേർത്ത് ഒന്ന് കറക്കി എടുക്കുക. (വെള്ളം ചേര്ക്കാതെ അരച്ചതിനു ശേഷം അല്പം വെള്ളം ഒഴിച്ച് അരച്ച് ഉരുട്ടി എടുക്കുക)

ഒരു ചീനച്ചട്ടിയിൽ വെളിച്ചെണ്ണ ഒഴിച്ച് ഉലുവ മൂപ്പിച്ചു, കടുക് പൊട്ടിച്ചു ഉള്ളി അരിഞ്ഞത് മൂപ്പിക്കുക. ഇതിലേക്ക് ഇഞ്ചി ചേർത്ത് മൂപ്പിക്കുക
ഒരു തണ്ട് കറിവേപ്പില ചേർത്ത് അരപ്പ് ഇടുക. അരപ്പ് നന്നായി വഴറ്റുക - അല്പം വെള്ളം ചേർത്ത് (2 ടേബിൾ സ്പൂണ്‍) അരപ്പ് എണ്ണയിൽ വഴന്നു എണ്ണ തെളിഞ്ഞാൽ പുളിവെള്ളവും ചാറിനു വേണ്ട വെള്ളവും ചേർത്ത് അരപ്പ് തിളപ്പിക്കുക. (ഉപ്പു നോക്കാൻ മറക്കണ്ട) തിള വന്നാൽ മീൻ കഷണങ്ങൾ ചേർത്ത് ചാറു കുറുകി വരുമ്പോൾ തീ അണക്കാം.

1/4 ടി സ്പൂണ്‍ ഉലുവ പൊടി (വറത്തു പൊടിച്ച ഉലുവ) രണ്ടു തണ്ട് കറിവേപ്പില എന്നിവ മേലെ ഇട്ടു കറി അടപ്പ് അല്പം മാറ്റി മൂടി വെക്കുക.

മീന്‍ പീര

,കുഞ്ഞൻ മത്തി നത്തോലി, പോലുള്ളവ)മീന്‍ -അര കിലോ
കുടംപുളി- രണ്ട് എണ്ണം (വെള്ളത്തില്‍ ഇട്ടു കുതിര്‍ത്ത് ,ചതച്ച് എടുത്ത്)
മഞ്ഞള്‍പ്പൊടി- കാല്‍ സ്പൂണ്‍
പച്ചമുളക്- നാലെണ്ണം
ഇഞ്ചി -ഒരു ചെറിയ കഷ്ണം
കുഞ്ഞുള്ളി-മൂന്നെണ്ണം
തേങ്ങ ചിരവിയത്- അര മുറി
കറിവേപ്പില
വെളിച്ചെണ്ണ

പാചകരീതി

തേങ്ങ, പച്ചമുളക്, കുഞ്ഞുള്ളി, ഇഞ്ചി, മഞ്ഞള്‍പ്പൊടി ഇവ നല്ല പോലെ ചത ചെടുക്കുക.
ഒരു ചട്ടിയില്‍വെള്ളം വാര്ത്തുകളഞ്ഞ ട്യൂണ യിട്ട് ,(ഇനി നെയ്യ് മീനു വേണോ അതും ഉ പയോഗിക്കാം ചെറുതായി പൊടിചിട്ടാൽ മാത്രം മതി ) തേങ്ങ ചിരവിയത് പച്ചമുളക് വെളുത്തുള്ളി കുഞ്ഞുള്ളി ഇഞ്ചി പച്ചമുളക് ഇവ ചതച്ചു എടുക്കുക ആവശ്യത്തിനു വെള്ളവും ചേര്‍ത്ത് മഞ്ഞള് പൊടിയും ഇട്ടു ഇളക്കി അടച്ചു വെച്ച് വേവിക്കുക. മീന്‍ ഉടഞ്ഞു പോകാതെ വേണം ഇളക്കാന്‍. ആവശ്യത്തിനു ഉപ്പും ചേര്‍ക്കണം. വെള്ളം വറ്റി കഴിയുമ്പോള്‍ അടുപ്പില്‍ നിന്നും ഇറക്കി വെച്ച്പച്ച വെളിച്ചെണ്ണ യും കറിവേപ്പിലയും ഇട്ടു അടച്ചു വെക്കുക. അല്പസമയത്തിനു ശേഷം ഉപയോഗിക്കുക.എങ്ങനെയുണ്ട് ???കൊള്ളാമോ

മീന്‍ പച്ചക്കറി വെച്ചത് / മീന്‍ തേങ്ങാ അരച്ച് വെച്ചത്

നാട്ടിന്‍ പുറങ്ങളില്‍ ഊണിനു സ്ഥിരം കാണുന്ന ഒരു മീന്‍ കറി ആണിത്, എന്‍റെ അമ്മച്ചി സ്പെഷ്യല്‍ ആണ് . നല്ല ഒന്നാന്തരം കറി ആണ് .

മീന്‍ പച്ചക്കറി എന്ന് കേട്ടിട്ട് പോലും ഇല്ലാത്തവര്ക്കായി , ഇതില്‍ പച്ചക്കറി ഒന്നും ചേര്ക്കുന്നില്ല, തേങ്ങാ പച്ചയ്ക്ക് അരച്ച് ചേര്ക്കുന്നത് കൊണ്ടായിരിക്കാം ഇതിനെ അങ്ങനെ വിളിക്കുന്നത്.

ഇതിന്‍റെ ചേരുവകള്‍ കൃത്യമായിരിക്കണം.

മീന്‍ - 15 കഷണങ്ങള്‍
ഒരു മുറി തേങ്ങാ തിരുമ്മിയത്‌
പച്ചമുളക് - 5
മുളക് പൊടി - 2 ടേബിള്‍ സ്പൂണ്‍
മല്ലിപൊടി -1/2 ടേബിള്‍ സ്പൂണ്‍
ചുവന്നുള്ളി - 2
കുടംപുളി - 3
കറി വേപ്പില – ഒരു കതിര്‍
ഉപ്പ് - 1 ½ ടേബിള്സ്പൂ്ണ്‍

ഉണ്ടാക്കുന്ന വിധം:

ആദ്യം ഒരു ഒരു മുറി തേങ്ങാ തിരുമ്മി അരച്ചെടുക്കണം,ഒരു മീഡിയം പരുവത്തില്‍ അരച്ചാല്‍ മതി.അരയ്ക്കുന്ന കൂട്ടത്തില് മുളക് പൊടിയും മല്ലിപൊടിയും ചുവന്നുള്ളിയും കൂടി അരയ്ക്കണം . എന്നിട്ട് കഴുകി മുറിച്ചു വെച്ചിരിക്കുന്ന മീന്‍ ചട്ടിയിലാക്കി അരപ്പും ഒഴിച്ച് പച്ചമുളകും കീറിയിട്ടു ഒരു തണ്ട് കറി വേപ്പിലയും കുടമ്പുളിയും കഴുകി ചേര്ത്തു് ഉപ്പും ചേര്ത്തു ഒന്ന് ഇളക്കി ചേര്ത്തു അടച്ചു വെച്ച് വേവിയ്ക്കുക.ഇടയ്ക്ക് അടപ്പ് തുറന്നു ഒന്ന് ഉപ്പ് നോക്കിയെക്കണം . 20 മിനിറ്റ് കഴിയുമ്പോള്‍ തീയ് അണയ്ക്കുക.മീന്‍ പച്ചക്കറി തയ്യാര്‍.

പ്രത്യേകം ശ്രദ്ധിക്കുക...വെളുത്തുള്ളി ,ഇഞ്ചി ഉലുവ,എണ്ണ,വെളുത്തുള്ളി ഒന്നും വേണ്ട...ഇതിനു ചേരില്ല
തേങ്ങാ അരയ്ക്കുന്നത് കൊണ്ട് എണ്ണ ചേര്ക്കണ്ട,
കുടമ്പുളി യുടെ വെള്ളം അല്ല കുടംബുളിയാണ് ചേര്‍ക്കേണ്ടത് ..
ചെറിയ തീയില്‍ വയ്ക്കണം,

മീന്‍ തേങ്ങാപാല്‍ കറി

ആവശ്യമായ സാധനങ്ങള്‍ :-

നെയ്മീന്‍-അര കിലോ (ദശ കട്ടിയുള്ള ഇതു മീനും എടുക്കാം )
ഇഞ്ചി-ഒരു ടേബിള്‍സ്പൂണ്‍(അരിഞ്ഞത് )
പച്ചമുളക് -മൂന്നു നാലെണ്ണം (നീളത്തില്‍ അരിഞ്ഞത് )
പുളി പിഴിഞ്ഞത് -ഒരു നാരങ്ങ വലുപ്പത്തില്‍ നിന്ന്
കൊച്ചുള്ളി-അഞ്ചു
കറിവേപ്പില-മൂന്നു ഇല
ജീരകം-അര ടീസ്പൂണ്‍
കട്ടി തേങ്ങാപാല്‍ -ഒന്നര കപ്പ്‌
മുളകുപൊടി-രണ്ടു ടേബിള്‍സ്പൂണ്‍
മല്ലിപൊടി-ഒന്നര ടേബിള്‍സ്പൂണ്‍
മഞ്ഞള്‍പൊടി-അര ടീസ്പൂണ്‍

താളിക്കാന്‍ ആവശ്യമായത് :-

കൊച്ചുള്ളി-മൂന്നു ( അരിഞ്ഞത് )
കറിവേപ്പില-ഒരു തണ്ട്
വെളിച്ചെണ്ണ-ഒരു ടേബിള്‍സ്പൂണ്‍
കടുക്-അര ടീസ്പൂണ്‍

ചെയേണ്ട വിധം :-

കൊച്ചുള്ളിയും കറിവേപ്പിലയും ജീരകവും പൊടികളും ചേര്‍ത്ത് അരച്ചെടുക്കുക.ഒരു ചട്ടിയില്‍ അറിഞ്ഞ ഇഞ്ചിയും പച്ചമുളകും പുളി വെള്ളവും ചേര്‍ക്കുക..അതിലേക്കു അരച്ചതും ചേര്‍ക്കുക.അതിലേക്കു മുറിച്ചു വൃത്തിയാക്കി വച്ചിരിക്കുന്ന മീന്‍ കഷ്ണങ്ങളും ചേര്‍ത്ത് അടച്ചു വച്ച് വേവിക്കുക.പത്ത് മിനിറ്റു കഴിഞ്ഞു അതിലേക്കു തേങ്ങാപാല്‍ ചേര്‍ത്ത് ഒന്ന് ചട്ടി ചുറ്റിച്ചു ഇളക്കുക.സ്പൂണ്‍ ഉപയോഗിക്കരുത് ..മീന്‍ പൊടിഞ്ഞു പോവും.വേവ് പാകമായി ചാറു കുറുകി വരുമ്പോള്‍ ഇറക്കിവക്കുക.മറ്റൊരു പാനില്‍ എണ്ണ ഒഴിച്ച് ചൂടാവുമ്പോള്‍ കടുകിട്ട് പൊട്ടിക്കുക.അതിലേക്ക് കൊച്ചുള്ളി അറിഞ്ഞതും കറിവേപ്പിലയും ഇട്ടു വഴറ്റി ഇത് കറിയില്‍ ചേര്‍ത്തിളക്കുക.പത്തിരുപതുമിനിറ്റു കറി മൂടി വക്കം..ഉപ്പും പുളിയും എരിവും ഒക്കെ മീനിലെക്കിറങ്ങി പിടിക്കാനനത് ...അതിനു ശേഷം വിളമ്പാം.....

Like

മീന്‍ ചോറ്

ബിരിയാണി റൈസ് – 1 cup 
ദശ കട്ടിയുള്ള മീന്‍ - 500 gm (മുള്ള് ഇല്ലാത്തതു എളുപ്പം)
സവാള – 1 വലുത്
തക്കാളി – 1 വലുത്
പച്ചമുളക് – 2 നുറുക്കിയത്
വെളുത്തുള്ളി – 4 അല്ലി നുറുക്കിയത് 
ഇഞ്ചി – 1 ചെറിയ കഷ്ണം നുറുക്കിയത്
പെരുംജീരകം - 1/4 tsp
മുളകുപൊടി – 1 tsp
കടുക്
കറിവേപ്പില
വെളിച്ചെണ്ണ
ഉപ്പ്
മഞ്ഞള്പൊടി - 1/4 tsp 
മുളകുപൊടി - 2 tsp 
എണ്ണ - 3/4 tsp 
ഉപ്പ്

അരി നാന്നായി കഴുകി ഉടഞ്ഞു പോകാതെ ഉപ്പ് ചേര്ത്ത് വേവിച്ചു എടുക്കുക. അല്പം നെയ്യ് ചേര്ത്ത് വേവിക്കണം കുഴയില്ല.

മീന്‍ വറുക്കാന്‍ പാകത്തിന് മുറിച്ചു അവസാനം പറഞ്ഞിരിക്കുന 4 ചേരുവകള്‍ ചേര്ത്ത് ഒരു ½ മണിക്കൂര്‍ വെയ്ക്കുക ശേഷം എണ്ണയില്‍ വറുത്ത് എടുത്തു ചെറിയ കഷ്ണങ്ങള്‍ ആക്കി മാറ്റി വെയ്ക്കുക.
ചുവടു കട്ടിയുള്ള പാത്രം വെച്ച് അതിലേക് മീന്‍ വറുത്ത എണ്ണ ബാക്കി വന്നത് ഒഴിച്ച്(ആവിശ്യം എങ്കില്‍ കുറച്ചൂടെ എണ്ണ ഒഴികാം)കടുകും പെരുംജീരകവും കറിവേപ്പിലയും പൊട്ടിച്ചു സവാള പച്ചമുളക് ഇഞ്ചി വെളുത്തുള്ളി അല്പം ഉപ്പ് എന്നിവ ചേര്ത്ത് നല്ല തീയില്‍ ഒന്ന് വഴറ്റുക (സവാള നിറം മാറിയ മതി മൂക്കേണ്ട) ശേഷം തീ കുറച്ചു തക്കാളിയും മുളകുപൊടിയും ചേര്ത്ത് വഴറ്റി പച്ചമണം മാറുമ്പോള്‍ അതിലേക് നുറുക്കിയ മീന്‍ കഷ്ണങ്ങള്‍ ചേര്ത്ത് പൊടിഞ്ഞു പോകാതെ നന്നായി യോജിപ്പിക്കുക ഉപ്പ് നോക്കി വേണമെങ്കില്‍ ചേര്ക്കാം ശേഷം വേവിചു വെച്ച ചോറ് ചേര്ത്ത് നന്നായി ഇളക്കി യോജിപ്പിച്ചു തീ അണച്ച ശേഷം ഒരു 10 മിനിറ്റ് അടച്ചു വെയ്ക്കുക ശേഷം ചൂടോടെ പപ്പടം അച്ചാര്‍ കൂട്ടി അകത്താക്കുക എല്ലാര്ക്കും ഇഷ്ട്ടപെടും ഉറപ്പു.

മത്തി-കുരുമുളക് ഫ്രൈ

മത്തി-കുരുമുളക് ഫ്രൈ

ചേരുവകള്‍ :--

മത്തി-പത്തെണ്ണം
കുഞ്ഞുള്ളി-പത്തെണ്ണം
ഇഞ്ചി-അര ഇഞ്ചു കഷ്ണം
വെളുത്തുള്ളി-അഞ്ചു അല്ലി
കുരുമുളകുപൊടി -മൂന്ന് -നാല് ടീസ്പൂണ്‍(നിങ്ങളുടെ ടേസ്റ്റ് അനുസരിച്ച് മാറ്റം വരുത്താം)
പച്ചമുളക്-മൂന്ന്‍
മഞ്ഞള്‍പൊടി-മുക്കാല്‍ ടീസ്പൂണ്‍
ഉപ്പ് ആവശ്യത്തിനു
വെളിച്ചെണ്ണ-ഷാലോ ഫ്രൈ ചെയാന്‍ വേണ്ടുന്നത്

ചെയേണ്ട വിധം :--

മത്തി വെട്ടി കഴുകി വൃത്തിയാക്കി വക്കുക.ചെറിയ മത്തി ആയതുകൊണ്ട് ഞാന്‍ വരഞ്ഞിട്ടില്ല..വലുതാണെങ്കില്‍.രണ്ടു മൂന്നു തവണ കുറുകെ വരഞ്ഞു വക്കുക.മസാല നല്ലപോലെ പിടിക്കനനത്.ഇനി കുഞ്ഞുള്ളിയും ,വെളുത്തുള്ളിയും,പച്ചമുളകും,ഇഞ്ചിയും,കുരുമുളകുപൊടിയും ,മഞ്ഞള്‍പൊടിയും,ഉപ്പും ചേര്‍ത്തരച്ച് സ്മൂത്ത്‌ പേസ്റ്റ് ആക്കുക..ഇത് മീനില്‍ പുരട്ടി ഒരു മണിക്കൂര്‍ വക്കുക.ഒരു പാനില്‍ വെളിച്ചെണ്ണ (നിങ്ങള്‍ക്കിഷ്ടമുള്ള എണ്ണ ഉപയോഗിക്കാം )ഒഴിച്ച് ചൂടാവുമ്പോള്‍ പതുക്കെ മീനിട്ട് രണ്ടു വശവും മൊരിയിചെടുക്കുക..മറിച്ചിടുമ്പോള്‍ പൊടിഞ്ഞു പോവാതെ ശ്രദ്ധിക്കണം..ചൂടോടെ ചോറിനൊപ്പം വിളമ്പുക ....... 

Lik

മത്തി, മാങ്ങാ ഇട്ടു തേങ്ങാപ്പാല്‍ ചേര്‍ത്ത കറി

ആവശ്യമുള്ള സാധനങ്ങള്‍ :-

മത്തി – 1 കിലോ 
പുളിയുള്ള മാങ്ങ – 4 എണ്ണം ചെറിയ കഷണങ്ങള്‍ ആക്കിയത്
ചെറിയ ഉള്ളി അരിഞ്ഞത് – ½ കപ്പു
സവാള – 1 എണ്ണം
ഇഞ്ചി – 1 കഷണം
വെളുത്തുള്ളി – 1 തുടം
പച്ചമുളക് നീളത്തില്‍ കീറിയത് – 8 എണ്ണം
മുളക് പൊടി – 1 ടീസ്പൂണ്‍
മല്ലി പൊടി – 2 1/2 ടേബിള്‍ സ്പൂണ്‍
മഞ്ഞള്‍ പൊടി - 1/2 ടീ സ്പൂണ്‍
ഉലുവ - 1/2 ടീ സ്പൂണ്‍
തേങ്ങാ പാല്‍ പൊടി – 1 കപ്പു
വിനാഗിരി - 1 1/2 ടേബിള്‍ സ്പൂണ്‍
----- താളിക്കാന്‍ -------
കടുക്
ഉലുവ - 1/2 ടീ സ്പൂണ്‍
വറ്റല്‍മുളക് – 2 എണ്ണം
കറിവേപ്പില
ചെറിയ ഉള്ളി - 4 എണ്ണം
വെളിച്ചെണ്ണ, ഉപ്പു – ആവശ്യത്തിനു

തയ്യാറാക്കുന്ന വിധം :

½ കപ്പു തേങ്ങാ പാല്‍ പൊടി വലിയ 1 കപ്പു ചെറു ചൂട് വെള്ളത്തില്‍ കലക്കി മാറ്റി വെക്കുക. ബാക്കിയുള്ള തേങ്ങാ പാല്‍ പൊടി കുറച്ചു വെള്ളത്തില്‍ കട്ടിയായി കലക്കി വെക്കുക.

മത്തി കഴുകി വൃത്തിയാക്കി കഷണങ്ങള്‍ ആക്കുക . അതില്‍ ഉപ്പു, 1 ടീസ്പൂണ്‍ മുളക് പൊടി, ഒരു നുള്ള് മഞ്ഞള്‍ പൊടി എന്നിവ പുരട്ടി അരമണിക്കൂര്‍ മൺകലത്തില്‍ മാറ്റി വെക്കുക.

ഫ്രയിംഗ് പാനില്‍ വെളിച്ചെണ്ണ ഒഴിച്ച് സവാള, ചെറിയ ഉള്ളി, ഇഞ്ചി, വെളുത്തുള്ളി, പച്ചമുളക് എന്നിവ ചേര്‍ത്തു വഴറ്റുക. അതിലേക്കു മല്ലിപ്പൊടി , ബാക്കിയിരിക്കുന്ന മഞ്ഞള്‍പ്പൊടി എന്നിവ ചേര്‍ത്തു നന്നായി വഴറ്റി യോജിപ്പിക്കുക. ഇതില്‍ മാറ്റിവെച്ചിരിക്കുന്ന കട്ടിയില്ലാത്ത തേങ്ങാപ്പാല്‍ ചേര്‍ത്തു തിളച്ചു കഴിയുമ്പോള്‍, മീന്‍ കഷണങ്ങള്‍ വെച്ചിരിക്കുന്ന മൺകലത്തിലേക്ക് ഒഴിച്ച് ഇളക്കി യോജിപ്പിക്കുക. ആവശ്യത്തിനു ഉപ്പു ചേര്‍ക്കുക.

ഒന്ന് തിളച്ചു കഴിയുമ്പോള്‍ മാങ്ങ ചേര്‍ത്തു മൂടി വെച്ച് നന്നായി വേവിക്കുക. കഷണങ്ങള്‍ വെന്തതിനു ശേഷം കട്ടിയുള്ള തേങ്ങാപ്പാല്‍ ഒഴിച്ച് വാങ്ങുക.

ഇതിലേക്ക് കടുക്, ഉലുവ, വറ്റല്‍മുളക്, കറിവേപ്പില, ചെറിയ ഉള്ളി, എന്നിവ താളിച്ച്‌ കറിയിലേക്ക് ഒഴിക്കുക. 5 മിനുട്ട് കഴിയുമ്പോള്‍ വിനാഗിരി ചേര്‍ത്തു കലം ഒന്ന് ചുറ്റിച്ചെടുക്കുക.

നെയ്യ് മത്തി വറുത്തത്

മത്തി - 1 കിലോ വെട്ടി തേച്ചു കഴുകി വൃത്തിയാക്കി വരഞ്ഞു എടുത്തത്‌ 
ഇഞ്ചി - 1 കഷണം, വെളുത്തുള്ളി - 6 അല്ലി, 4 കറിവേപ്പില ഇത്രയും അരച്ചെടുക്കുക
(ഇഞ്ചി വെളുത്തുള്ളി അരച്ച ശേഷം അവസാനം കറിവേപ്പില ചേർത്ത് ചട്ണി ജാറിൽ ഒന്ന് കറക്കി എടുക്കുക. ഇല അരഞ്ഞാൽ പച്ചില അരഞ്ഞ ചുവ വരും). 

ഇനി ഇതിലേക്ക് 1/4 ടി സ്പൂണ്‍ മഞ്ഞൾ പൊടി, 1 ടേബിൾ സ്പൂണ്‍ മുളകുപൊടി 1 / 2 ടേബിൾ സ്പൂണ്‍ കുരുമുളക് പൊടി (ക്രഷ്ഡ് - തരുതരുപ്പായി പൊടിച്ചത്), 1/ 4 ടി സ്പൂണ്‍ ഉലുവ പൊടി ആവശ്യത്തിനു ഉപ്പു ഇവ ചേർത്ത് അല്പം വെള്ളം ചേർത്ത് നന്നായി കുഴച്ചു എടുത്തു വരഞ്ഞ് വച്ച മീനിൽ തേച്ചു പിടിപ്പിച്ചു 20 മിനിറ്റ് മാറ്റിവെക്കുക.

ശേഷം സ്റ്റൊവ്വിൽ പാൻ വെച്ച് മീൻ നിരത്തി എണ്ണ ഒഴിച്ച് രണ്ടു വശവും വറത്തു മൂപ്പിച്ചു കോരുക.

ശ്രദ്ധിക്കുക

നെയ്യ് മത്തി ആയതിനാൽ വറുക്കുമ്പോൾ എന്നയിലേക്ക് നെയ്യ് കിനിഞ്ഞു ഇറങ്ങും. അത് കൊണ്ട് ആദ്യം അല്പം മാത്രം എണ്ണ (വെളിച്ചെണ്ണ ഉത്തമം) ആദ്യ വശം മൂപ്പിച്ചു തിരിച്ചിട്ട ശേഷം വീണ്ടും എണ്ണ ഒഴിച്ച് മറ്റേ വശം മൊരിക്കണം. ഇങ്ങനെ ചെയ്താൽ മത്തിയുടെ നെയ്യ് ചുവയും മണവും കുറക്കാൻ പറ്റും. വെളിച്ചെണ്ണയിൽ കുരുമുളക് മൂത്ത മണം മുന്നില് നില്ക്കും.

കറിവേപ്പിലയും മീനിന്റെ നെയ്‌ മണം മാറ്റാൻ സഹായിക്കും. വേപ്പില ഇടുന്നെങ്കിൽ, മീൻ നിരത്തുന്നതിനു മുന്നേ തന്നെ പാനിൽ ഇല ഇട്ടതിനു മേലെ മീൻ നിരത്തുക.

മീൻ വറുത്തു കഴിഞ്ഞു പാനിൽ നിന്നും അധികമുള്ള നെയ്‌ ചേര്ന്ന എണ്ണ ഊറ്റി കളഞ്ഞു ചെറിയ തീയിൽ ഒന്നുകൂടി 1 ടി സ്പൂണ്‍ വെളിച്ചെണ്ണ തൂവി മീൻ മൂപ്പിക്കുക.

Enjoy!!!!

നെയ്മീന്‍ വറുത്തത്

ചേരുവകള്‍ :-

നെയ്മീന്‍ -അര കിലോ (ദശ കട്ടിയുള്ള ഏതു മീനും എടുക്കാം.)കഷ്ണങ്ങലാക്കിയത്
മുളകുപൊടി-ഒരു ടീസ്പൂണ്‍
നാരങ്ങ നീര് -മുക്കാല്‍ ടീസ്പൂണ്‍
തയിര്‍-ഒരു ടീസ്പൂണ്‍(അധികം പുളിയില്ലാത്തത് )
പച്ചമുളക്-ഒന്ന്‍
ഇഞ്ചി-കാല്‍ ഇഞ്ചു കഷ്ണം
വെളുത്തുള്ളി-മൂന്ന്‍ അല്ലി
കുഞ്ഞുള്ളി-നാല്
മല്ലിയില-രണ്ടു കൊത്ത്
കറിവേപ്പില-ഒരു തണ്ട്
ഗരംമസാല-അര ടീസ്പൂണ്‍
ജീരകം-അര ടീസ്പൂണ്‍
ഉപ്പ്-ആവശ്യത്തിനു
എണ്ണ-വറുക്കാന്‍ ആവശ്യമായത്

ചെയേണ്ട വിധം :-

മീന്‍ കഴുകി ഊറ്റി വക്കുക..എണ്ണയും മീനും ഒഴികെയുള്ള ചേരുവകള്‍ ചേര്‍ത്ത് നല്ല മയത്തില്‍ അരച്ചെടുക്കുക..വെള്ളം അല്പം പോലും ചേര്‍ക്കരുത്.ഈ അരപ്പ് മീനില്‍ നല്ലവണ്ണം പുരട്ടി ഒരു മണിക്കൂര്‍ വക്കുക.ഒരു പാനില്‍ എണ്ണ ഒഴിച്ച് നന്നായി ചൂടാവുമ്പോള്‍ പുരട്ടിവച്ച മീന്‍ കഷ്ണങ്ങള്‍ ഇട്ടു പൊടിഞ്ഞു പോവാതെ രണ്ടു വശവും മോരിയുന്നവരെ വറുത്തു കോരുക..ചൂടോടെ ചോറിനൊപ്പം വിളമ്പാം ...ചപ്പാത്തിക്കും യോജിക്കുന്ന ഒരു സൈഡ് ആണിത്..ട്രൈ ചെയു ഫ്രണ്ട്സ് ....

നെത്തോലി വറുത്തത് / Netholi Varuthathu

പാകത്തിനു മഞ്ഞൾപൊടിയും, മുളകുപൊടിയും, ഉപ്പും ചേർത്ത് മീനിൽ പുരട്ടി കുറച്ചു നേരം വച്ചതിനു ശേഷം തിളച്ച എണ്ണയിൽ വറുത്തെടുക്കുക

നെത്തോലി ബജി

നെത്തോലി മീന്‍ -കാല്‍ കിലോ
ഇഞ്ചി അരച്ചത് -അര ടേബ്ള്‍ സ്പൂണ്‍
പച്ചമുളക് അരച്ചത് -അര ടേബ്ള്‍ സ്പൂണ്‍
മുളകുപൊടി -ഒരു ടേബ്ള്‍ സ്പൂണ്‍
നിലക്കടല വറുത്തരച്ചത് -50 ഗ്രാം
തക്കാളി പേസ്റ്റ് -രണ്ട് ടേബ്ള്‍ സ്പൂണ്‍
ചെറുനാരങ്ങാനീര് -ഒരു ടേബ്ള്‍ സ്പൂണ്‍
കടലമാവ് -ആവശ്യത്തിന്
വെളിച്ചെണ്ണ -പൊരിക്കാന്‍ ആവശ്യമായത്

നെത്തോലി മീന്‍ മുള്ള് കളഞ്ഞ് വൃത്തിയാക്കുക. വെള്ളം വാാര്‍ത്തുകളയണം. വെളിച്ചെണ്ണ ഒഴികെയുള്ള ചേരുവകള്‍ പക്കാവട പാകത്തില്‍ കുഴച്ചെടുക്കണം. കടലമാവ് അധികമാകാതെ ശ്രദ്ധിക്കണം. കുഴച്ചെടുത്ത മാവ് അര മണിക്കൂര്‍ വെക്കണം. ഫ്രയിങ് പാനില്‍ എണ്ണ ഒഴിച്ച് ചൂടായാല്‍ മാവും മീനും ചേര്‍ന്ന മിശ്രിതം എണ്ണയില്‍ നുള്ളിയിട്ട് പൊരിക്കുക. സോസ്, ചട്‌നി ഇവക്കൊപ്പം ഉപയോഗിക്കാം.

നമ്മുടെ സ്വന്തം മത്തി...

കുരുമുളക്, 

 ഇഞ്ചി, 

മുളകുപൊടി(കുറച്ച്), 

മഞ്ഞള്‍പ്പൊടി, 

ഉപ്പ്, 

കടുക്.... 

എല്ലാം കൂടി അരച്ച്, വെട്ടി വൃത്തിയാക്കി വരഞ്ഞ മത്തിയില്‍ പുരട്ടി ഒരു 20 മിനിറ്റ്... 
ചൂടാക്കിയ ചട്ടിയില്‍ ഒരു വാഴയിലക്കീറ് വച്ചിട്ട് മുകളില്‍ മത്തി നിരത്തി അതിനു മുകളില്‍ ഒരു ഇലക്കീറു കൂടി...

ഇല പതിഞ്ഞിരിയ്ക്കാന്‍ മുകളില്‍ ചെറിയൊരടപ്പ് വയ്ക്കാം... 
ഒരു വശം പാകമായാല്‍ മൊത്തത്തില്‍ ഇലയടക്കം മറിച്ചിടാം...
ഇഷ്ടാനുസരണം പൊള്ളിച്ചെടുക്കുകയോ മൊരിച്ചെടുക്കുകയോ ആവാം... 
ഒരു തുള്ളി എണ്ണ പോലും ചേര്‍ക്കരുത്....
പച്ചകുരുമുളകാണെങ്കില്‍ കിടിലമായിരിയ്ക്കും...

നത്തോലി(ഒരു ചെറു മീനാണ്) ഫ്രൈ..

ആവശ്യമായ സാധനങ്ങള്‍
1. നത്തോലി : 300 ഗ്രാം
2. വെളുത്തുള്ളി : അഞ്ചു അല്ലി
3. ഇഞ്ചി : ഒരു ചെറിയ കഷ്ണം
4. കുഞ്ഞുള്ളി : എട്ടു എണ്ണം
5. പെരും ജീരകം : കാല്‍ ടീസ്പൂണ്‍
6. കറിവേപ്പില : രണ്ടിതള്‍
7. മുളകുപൊടി : ഒന്നര ടീസ്പൂണ്‍
8. മഞ്ഞള്‍ പൊടി : അര ടീസ്പൂണ്‍
9. കുരുമുളകുപൊടി : ഒരു ടീസ്പൂണ്‍
10. ഉപ്പ് : പാകത്തിന്
11. കോണ്‍ ഫ്ലോര്‍ : ഒരു ടീസ്പൂണ്‍
12. വെളിച്ചെണ്ണ : മുക്കി പൊരിക്കാന്‍ വേണ്ടത്

തയ്യാറാക്കുന്ന വിധം
നത്തോലി വൃത്തിയാക്കിയതില്‍ രണ്ടുമുതല്‍ ആറു വരെയുള്ള ചേരുവകള്‍ ചതച്ചതും ബാക്കി ചേരുവകളും കട്ടിയില്‍ ക്രീം ആക്കി പുരട്ടി അരമണിക്കൂര്‍ വെക്കുക. അവിടെ ഇരിക്കട്ടെ...പോയി ഒരു സീരിയല്‍ കണ്ടു വന്നോളു....അര മണിക്കൂര്‍ കഴിഞ്ഞു ഒരു പാനില്‍ എണ്ണ ചൂടാക്കി ചെറുതീയില്‍ വറുത്തെടുക്കുക.

ചെറു ചൂടോടെ ചോറിനൊപ്പം വിളമ്പാം...

തേങ്ങ അരച്ച മീന്കറി

 ദശക്കട്ടിയുള്ള മീന്‍- 8 88കഷണം 
ചെറിയ ഉള്ളി - 15 എണ്ണം
ഇഞ്ചി - 1/2“ കഷണം
പച്ചമുളക് - 1എണ്ണം നെടുകെ കീറിയത്
വെളിച്ചെണ്ണ - 3 ടേബിള്‍ സ്പൂണ്‍
മഞ്ഞള്‍ പൊടി - 1/4 ടീസ്പൂണ്‍
മുളകുപൊടി - 4 ടീസ്പൂണ്‍
കുടംപുളി - 3 ചെറിയ കഷണം
വെള്ളം - ആവശ്യത്തിനു
ഉപ്പ് - ആവശ്യത്തിനു
തേങ്ങ - 3 ടേബിള്‍ സ്പൂണ്‍ 
അരപ്പ് ഉണ്ടാക്കുന്ന വിധം
തേങ്ങയും, മഞ്ഞള്‍ പൊടിയും, മുളക് പൊടിയും, ഇഞ്ചിയും , മൂന്നോ നാലോ ചെറിയ ഉള്ളിയും അല്പം വെള്ളം ചേര്ത്ത്ി മിക്സിയില്‍ നന്നായി അരചെടുക്കുക. ഒരു മഞ്ചട്ടി അടുപ്പില്‍ വെച്ച് ചൂടാകുമ്പോള്‍ വെളിച്ചെണ്ണ ഒഴിച്ച് വട്ടത്തില്‍ അരിഞ്ഞ ബാക്കി ചെറിയഉള്ളിയും, പച്ചമുളകും കുറച്ചു വേപ്പിലയും മൂപ്പിചെടുക്കുക. അതിലേക്കു അരപ്പ് ചേര്ത്ത് എണ്ണ തെളിയുന്നത് വരെ വഴറ്റുക. വഴന്നു വന്നാല്‍ പുളിവെള്ളവും, ഉപ്പും ചേര്‍ത്ത് തിളപ്പിക്കുക. അതിലേക്കു ആവശ്യത്തിനു വെള്ളം ചേര്ക്കുവക. മീനിനു മുകളില്‍ നില്ക്കാ നുള്ള വെള്ളം വേണം. അത് തിളക്കുമ്പോള്‍ മീന്‍ ചേര്ത്കള തിള വരുമ്പോള്‍ ചെറിയ തീയില്‍ വറ്റിചെടുക്കുക എണ്ണ മുകളില്‍ നന്നയി തെളിഞ്ഞു വരുന്നതാണ് പാകം

ട്യുണ തോരന്‍

ആവശ്യമായവ:
ട്യുണ ( canned tuna) - 1 ക്യാന്‍
എണ്ണ- ആവശ്യത്തിനു
സവാള - ഒരു വലുത്

തക്കാളി- 1 ചെറുത്
പച്ചമുളക് - 1
ഇഞ്ചി- ഒരു ചെറിയ കഷണം
വെളുത്തുള്ളി - 3 അല്ലി
കറി വേപ്പില- 1 കതിര്‍
കടുക്
ഗരം മസാല- 1/2 ടീസ്പൂണ്‍
തേങ്ങാ തിരുമ്മിയത്‌ - 3 ടേബിള്‍ സ്പൂണ്‍

മഞ്ഞള്‍പ്പൊടി - ഒരു നുള്ള്
മുളക് പൊടി-1/2 ടീസ്പൂണ്‍
മല്ലിപൊടി- 1/2 ടീസ്പൂണ്‍

ഉണ്ടാക്കുന്ന വിധം:

ആദ്യം ട്യുണ ടിന്നില്‍ നിന്നും ഒരു പാത്രത്തിലേക്ക് മാറ്റി വയ്ക്കുക.
ഇനി ഒരു പാനില്‍ എണ്ണ ഒഴിച്ച് ചൂടാകുമ്പോള്‍ കറി വേപ്പിലയും കടുകും താളിച്ചു ഇഞ്ചി, വെളുത്തുള്ളി ,പച്ചമുളക്, സവാള എന്നിവ അരിഞ്ഞത് നന്നായി വഴറ്റുക,തക്കാളി കൂടി ചേര്‍ത്തു വഴറ്റുക.മസാലകള്‍ എല്ലാം ചേര്‍ത്തു വഴറ്റി കുറച്ചു തേങ്ങാ തിരുംമിയതും ട്യുണയും ചേര്‍ത്തു ആവശ്യതിനു ഉപ്പും ചേര്‍ത്തു നന്നായി ഇളക്കി യോജിപ്പിച്ചു കുറച്ചു വെള്ളം തളിച്ച് 10 മിനിറ്റ് അടച്ചു വയ്ക്കുക.,വെന്തതിനു ശേഷം ഒന്ന് ചിക്കി എടുത്തു തീയ് അണയ്ക്കുക.
വാല്‍ക്കഷണം:
തേങ്ങാ ചേര്‍ക്കുന്നത് അവരവരുടെ ഇഷ്ടമാണ്.ചേര്‍ക്കാതെയും ട്യുണ ഇങ്ങനെ ഉലര്‍ത്തി എടുക്കാം.

ഞണ്ട്‌ മസാല

ഞണ്ട്‌ മസാല.. 

ഞണ്ട്‌ ---6 
സവാള ചെറുതായി അറിഞ്ഞത് --2 
ചെറിയ ഉള്ളി നീളത്തില്‍ അരിഞ്ഞത് -1 /2 കപ്പ്‌ 
ഇഞ്ചി ---
വെളുത്തുള്ളി...
തക്കാളി അരിഞ്ഞത് --1
പച്ചമുളക് രണ്ടായി പിളര്‍ന്നത് --3
പിരിയാന്‍ മുളക് പൊടി---1 1 /2 ടേബിള്‍ സ്പൂണ്‍
മല്ലിപ്പൊടി ---1 ടേബിള്‍ സ്പൂണ്‍
മഞ്ഞള്‍പ്പൊടി -1 ടീ സ്പൂണ്‍
ഗരം മസാല --3 /4 ടീ സ്പൂണ്‍
കുടം പുളി--1 വലിയ കഷ്ണം
ഉപ്പു --
കറിവേപ്പില
വെള്ളം ---2 കപ്പ്‌
വെളിച്ചെണ്ണ--2 ടേബിള്‍ സ്പൂണ്‍


പാകം ചെയ്യുന്ന വിധം :--(ഞണ്ട്‌ ,കാലും
കയ്യുമെല്ലാം ഓടിച്ചു മാറ്റി,തോടിളക്കി,വൃത്തിയാക്കി ,രണ്ടായി മുറിച്ചു കഴുകിയെടുക്കുക..അതിന്റെ കാലുകള്‍ തോട് കുറച്ചു പൊട്ടിച്ചു കളഞ്ഞിട്ടു ഇതിന്റെ കൂടെ ഇടാം കേട്ടോ .)
ചട്ടിയില്‍ ഞണ്ടും ,മല്ലിപ്പൊടി,മുളക് പൊടി,മഞ്ഞള്‍പ്പൊടി ,കുടംപുളി,ഉപ്പു ഒന്നിച്ചാക്കി ,രണ്ടു കപ്പ്‌ വെള്ളവും ഒഴിച്ച് വേവിക്കുക..
വെന്തു ചാര് പകുതിയായി വറ്റുമ്പോ തീ ഓഫ്‌ ആക്കുക...
ചീന ചട്ടിയില്‍ എണ്ണ ചൂടാക്കി,വെളുത്തുള്ളി ,ഇഞ്ചി,ചെറിയ ഉള്ളി,സവാള,പച്ചമുളക് ഇവ വഴറ്റുക...
ബ്രൌണ്‍ നിറമാകുമ്പോള്‍ തക്കാളിയും ചേര്‍ത്തു വഴറ്റുക....അതിനു ശേഷം വേവിച്ച ഞണ്ട്‌ ചാറോട് കൂടി ഇതിലേക്ക് ഒഴിച്ച് കറിവേപ്പിലയും ചേര്‍ത്തു ,ചെറു തീയില്‍ വേവിക്കുക...
ചാറു ആവശ്യത്തിനു വറ്റി കുഴഞ്ഞ പാകമാകുമ്പോള്‍ അടുപ്പില്‍ നിന്നും മാറ്റുക...ഞണ്ട്‌ മസാല റെഡി

ചെമ്മീൻ മസാല

ചെമ്മീൻ - നന്നാക്കി കഴികുയെടുത്തത് - 1 kilo
ഉള്ളി 5-6 ചതച്ചത്
ഇഞ്ചി വെളുത്തുള്ളി ചതച്ചത് - 3 -4 tbsp
പച്ചമുളക്, കറിവേപ്പില
മുളകുപൊടി - 2-3 tbsp
മഞ്ഞൾപൊടി - 1/2 tsp
കുരുമുളകുപൊടി - ഒരു നുള്ള്
ഉപ്പു - പാകത്തിന്
എണ്ണ

നുമ്മ ചെമ്മീൻ വെയ്ക്കണയാണേ.. അതിന്റെ ഒരു രീതി:

തോടുകളഞ്ഞു വൃത്തിയാക്കി കഴുകിയ ചെമ്മീനിൽ ഉള്ളി, വെളുത്തുള്ളി, ഇഞ്ചി ചതച്ചതും, മുളക്,മഞ്ഞൾ, കുരുമുളക് പൊടികളും ഉപ്പും ഒരു ചെറിയ സ്പൂണ്‍ എണ്ണയും ചേർത്ത് പെരട്ടി പത്തു ഇരുപതു മിനിറ്റോളം വെയ്ക്കുക. പാചകം ചെയ്യുന്ന ചട്ടിയിൽ തന്നെ വെയ്ക്കാം.
ഇതിലേക്ക് കുറച്ചു വെള്ളം ചേർത്ത് അടുപ്പിൽ മൂടി വെച്ച് വേവിക്കുക. 10 -15 മിനിട്ട് കൊണ്ട് വെന്തു പാകമാകും, ചെമ്മീൻ അധികം വേവിക്കരുത്.
ചാറു കുറുകി വരുമ്പോൾ 2 സ്പൂണ്‍ എണ്ണയൊഴിച്ച് പച്ചമുളക് കീറിയതും കറിവേപ്പിലയും ഇട്ടു അടുപ്പിൽ നിന്നും വാങ്ങുക.
മണ്‍ ചട്ടിയിൽ ആയതു കൊണ്ട് ഇരിക്കുമ്പോൾ ചാറ് കുറുകും, അധികം വറ്റിക്കാതെ ശ്രദ്ധിക്കുക.
ഇറക്കുന്നതിനു മുൻപ് എണ്ണ ചേർക്കുന്നതാണ് ഈ കറിക്ക് പ്രത്യേക രുചി തരുന്നത്‌.
പൊട്ടിക്കാതെ രണ്ടു മൂന്നു കറുത്ത കുരുമുളക് കൂടി ഇതിൽ ചേർക്കാറുണ്ട് .
ചൂട് ചോറും ചെമ്മീനും...
അതിലും രുചിയാണ് പാചകം ചെയ്യുന്ന ചട്ടിയിൽ ചോറിട്ട് കഴിക്കുന്നത്‌... ചട്ടി ചോറു എന്ന് കേട്ടാൽ ബണ്ടിച്ചോറും വീഴുമെന്നാണല്ലോ!

Like

ചെമ്മീൻ പീര പറ്റിച്ചത്

ഉണ്ടാക്കാൻ വേണ്ട സാധനങ്ങളും പാചകരീതിയും ഇതാ:~

ചെമ്മീൻ - അര കിലോ, കിള്ളി വൃത്തിയാക്കി കഴുകിയെടുത്തത് 
തേങ്ങാ പീര - 1 cup 
മുളക് പൊടി - 1.5-2 tbsp, മഞ്ഞൾപൊടി - 1/4 tsp 
ചെറിയ ഉള്ളി -3-4
വെളുത്തുള്ളി - 4-5, ഇഞ്ചി -1" pc
കുടംപുളി -3-4 pcs വെള്ളത്തിൽ കുതിർത്തത് 
പച്ചമുളക്, കറിവേപ്പില 
കടുക്, ഉലുവ 
എണ്ണ, ഉപ്പു - പാകത്തിന് 

തേങ്ങാപീര കുഞ്ഞുള്ളിയും ഇഞ്ചിയും പച്ചമുളകും ചേർത്തു ചതച്ചെടുക്കുക. 
വൃത്തിയാക്കി വെച്ച ചെമ്മീനിൽ മുളകുപൊടി മഞ്ഞൾപൊടി ചതച്ച തേങ്ങാപീര, കുതിർത്ത കുടംപുളി, പച്ചമുളക് നന്നായി ചേർത്തു വെയ്ക്കുക, പാകത്തിന് ഉപ്പും. ഇത് ഒരു പത്തു പതിനഞ്ചു മിനിട്ട് വെച്ചേക്കുക. 
ഒരു മണ്‍ചട്ടിയിൽ വെളിച്ചെണ്ണ ചൂടാക്കി കടുകും ഉലുവയും പൊട്ടിക്കുക. ഇതിലേക്ക് പീര ചേർത്ത ചെമ്മീൻ ഇട്ടു ഇളക്കി ചെറുതീയിൽ മൂടി വെച്ച് വേവിക്കുക. അധികം വെള്ളം ചേർക്കരുത്, ചെമ്മീനിൽ നിന്നും വെള്ളം ഇറങ്ങും. 
ഇരുപതു മിനിട്ടിനുള്ളിൽ ഇടത്തരം ചെമ്മീൻ ആണെങ്കിൽ വെന്തിട്ടുണ്ടാകും. ചെറിയ ചെമ്മീനു സമയം കുറവ് മതി. 
അടുപ്പിൽ നിന്നും വാങ്ങുന്നതിന് മുൻപ് ഒരു ചെറിയ സ്പൂണ്‍ എണ്ണയും കറിവേപ്പിലയും ചേർക്കുക. 

ഇങ്ങനെ പീര ഒതുക്കിയത് കുറച്ചു സമയം വെച്ചിട്ട് കഴിക്കുന്നതാണ് രുചി, അപ്പോളേയ്ക്കും ചെമ്മീനിൽ എരിവും പുളിയുമൊക്കെ പിടിച്ചിട്ടുണ്ടാവും. കുറച്ചു പീര കിട്ടിയാലും മതി ചോറുണ്ണാൻ 

ചെമ്മീൻ തേങ്ങാ മസാല

ആവശ്യം വേണ്ടത്: (കാൽ കിലോ ചെമ്മീൻ ഉണ്ടാക്കാൻ ഉപയോഗിച്ച അളവാണ് ഇവിടെ കൊടുക്കുന്നത്)
ചെമ്മീൻ - തോട് കളഞ്ഞു വൃത്തിയാക്കിയത് - 250 gm
തേങ്ങാപ്പാൽ - കട്ടിയുള്ളതു - 1/2 കപ്പു
നാരങ്ങാനീര് - 1.5 tsp
തേങ്ങാക്കൊത്ത് - പാകത്തിന്
ഉള്ളി 1, ഇഞ്ചി 1" pc, വെളുത്തുള്ളി 5-6, തക്കാളി 1-2 ചെറുത്‌: ഇവ അരിഞ്ഞത്
കടുക്, വറ്റൽ മുളക്, ഉലുവ, എണ്ണ, കറിവേപ്പില, പച്ചമുളക്
മുളക് പൊടി (കശ്മീരി) - 1 tsp, മഞ്ഞൾ പൊടി 1 pinch, കുരുമുളകു പൊടി - 1/4 tsp, ഉപ്പു

പാചകരീതി:~
---------------
ചട്ടിയിൽ എണ്ണ ചൂടാക്കി കടുക് പൊട്ടിച്ചു വറ്റൽ മുളകു കഷ്ണങ്ങളും ഉലുവയും ചേര്ക്കുക. ഇതിലേക്ക് അരിഞ്ഞു വെച്ചിരിക്കുന്ന ഉള്ളി, വെളുത്തുള്ളി, ഇഞ്ചി ഇവ ചേർത്തു നല്ലത് പോലെ വഴറ്റുക. വഴന്നുവരുമ്പോൾ തക്കാളി കഷ്ണങ്ങൾ, കറിവേപ്പില ചേർക്കുക. ഇത് നന്നായി മൂക്കുമ്പോൾ മുളക് മഞ്ഞൾ കുരുമുളക് പൊടികൾ ചേർക്കുക. ഈ മസാല വഴന്നു വരുന്നതിലേക്ക് ചെമ്മീനും ഉപ്പും ചേർത്തു ഇളക്കുക.
എന്നിട്ട് തേങ്ങാപ്പാലും നാരങ്ങാനീരും ചേർത്ത് മൂടി വെച്ചു വേവിക്കുക. വെന്തു കുറുകി വരുമ്പോൾ നല്ല മണമാണ്.
ചാറു വറ്റി മസാല ചെമ്മീനിലും തേങ്ങാ കഷ്നങ്ങളിലും പെരണ്ടിരിക്കുന്നതാണ് പാകം.
അടുപ്പിൽ നിന്നും വാങ്ങുന്നതിന് മുൻപ് കുറച്ചു എണ്ണ ചേർത്ത് ചട്ടി ചുറ്റിച്ചു പച്ചമുളക് കീറിയിടുക.
കറിച്ചട്ടിയിൽ ആണ് വെയ്ക്കുന്നതെങ്കിൽ ചാറു അധികം കുറുകുന്നതിനു മുൻപ് അടുപ്പിൽ നിന്നും വാങ്ങുക, മണ്‍ചട്ടിയിൽ ഇരുന്നു ചാറ് വറ്റും. വെച്ച് കുറച്ചു നേരം കഴിഞ്ഞു കഴിക്കുന്നതാണ് സ്വാദ്‌, പുളിയും എരിവും ഒക്കെ പിടിക്കും.

ഇത് വെച്ച ചട്ടിയിൽ ചോറിട്ടു തിന്നു നോക്കിയിട്ട് പറയൂ ഇതിന്റെ സ്വാദ്

[* ചെമ്മീന്റെ വലിപ്പം അനുസ്സരിച്ച് വേവിന്റെ സമയം ക്രമീകരിക്കുക, 10-12 മിനിട്ടോളം മതി. **എണ്ണ കുറച്ചു ഉപയോഗിക്കുക, തേങ്ങാപ്പാലും തേങ്ങാക്കൊത്തും ഒക്കെ ഉള്ളത് കൊണ്ടാണ്].